„KEA er kóngurinn í jólakjötinu”
12.12.2014 - Lestrar 608
KEA hangikjötið frá Norðlenska er það besta í ár að mati dómnefndar í árlegri bragðkönnun DV þar sem teknar voru út þrettán tegundir af kjöti. „Óhætt er að segja að KEA sé kóngurinn í jólakjötinu í ár því svínahamborgarhryggur KEA varð hlutskarpastur í bragðprófuninni sem birtist í þriðjudagsblaði DV,” segir í blaðinu í dag.
DV segir að baráttan um efstu sætin hafi verið hnífjöfn og ljóst að mikið sé af sérlega góðu hangikjöti á boðstólum í ár.
Þetta er áttunda árið sem DV framkvæmir þessa bragðprófun og var hangikjötsmökkunin, líkt og undanfarin ár, undirbúin og skipulögð af matreiðslumeistaranum Brynjari Eymundssyni á Höfninni.
