Áramótahugleiðing framkvæmdastjóra
Mikil vinna fór í það á árinu hjá stjórn og stjórnendum að verja eign bænda í Norðlenska og jafnframt var farið í hagræðingar til að bæta reksturinn. Það gekk vel en þó er ljóst að halda þarf áfram á sömu braut því enn vantar upp á að afkoman sé viðunandi.
Eigið fé Norðlenska var upp urið eins og hjá mörgum öðrum fyrirtækjum landsins en mikill árangur náðist við endurskipulagningu fjárhags, m.a. með leiðréttingum á erlendum lánum, bæði hjá Landbanka og SP-Fjármögnun. Þetta, ásamt rekstrarbata, varð til þess að fyrirtækið var rekið með hagnaði og eigið fé þess verður aftur orðið jákvætt um áramót.
Sá árangur sem náðst hefur er í raun meiri en vænta mátti því rekstrarumhverfi fyrirtækja er erfitt. Þá eru ákvarðanir stjórnvalda ekki til þess fallnar að koma hjólum efnahagslífsins á snúning, í raun gera þær fyrirtækjum erfiðar fyrir en ella. Stjórnvöld virðast viljandi eða óviljandi leggja steina í götu lífvænlegra fyrirtækja og ekki horfa á heildarhagsmuni atvinnulífsins.
Að lokum þakka ég öflugum hópi starfsfólks, innleggjendum og viðskiptavinum ánægjuleg samskipti á árinu sem er að líða. Ég óska öllum starfsmönnum Norðlenska og fjölskyldum þeirra, sem og landsmönnum öllum, gleðilegs árs.
Sigmundur Einar Ófeigsson,
framkvæmdastjóri Norðlenska
