Fréttir

Á dögunum var frá því greint að Akureyringar væru orðnir sautján þúsund. Sautján þúsundasti Akureyringurinn, Gabríel Óskar Dziubinski, fæddist á Fjórðungssjúkrahúsinu á Akureyri þann 3. júlí sl. og er hann sonur hjónanna Krzysztof Dziubinski og Beatu  Dziubinska, sem bæði eru starfsmenn Norðlenska.

Af þessu tilefni færði Sigrún Björk Jakobsdóttir, bæjarstjóri á Akureyri, fjölskyldunni veglegan blómvönd og bókina "Barnið okkar".

Þau Krzysztof Dziubinski og Beata Dziubinska hafa átt lögheimili á Akureyri frá febrúar 2004 og kunna afar vel við sig. Krzysztof er lærður kjötiðnaðarmaður og hóf störf hjá Norðlenska þann 15. mars 2004. Beata hefur starfað hjá Norðlenska síðan 15. apríl 2005. Þá starfar dóttir þeirra, Iwona Dziubinski, sem er sextán ára gömul, hjá Norðlenska í sumar.

Dziubinski-hjónin eiga tvö önnur börn, Isabelu Dziubinska, sem er fædd 1993, og Aleksander Dziubinski, sem er fæddur 1998.

Meðfylgjandi mynd var fengin af vef Akureyrarbæjar.