Fréttir

Sláturtíðinni er nú lokið hjá Norðlenska á Höfn í Hornafirði. Alls var slátrað 37.500 fjár sem er töluvert meira en fyrir ári, þegar fjöldinn var 31.500. Einar Karlsson sláturhússtjóri Norðlenska á Höfn er ánægður hvernig til tókst, og segir sláturtíðina hafa gengið mjög vel

„Við kláruðum í raun um mánaðamótin, en slátruðum svo 700 gimbrum í lok síðustu viku. Þar með lauk sláturtíðinni endanlega hjá okkur,“ segir Einar. „Dagsskammturinn voru 1100 til 1200 lömb og þetta gekk ljómandi vel. Við vorum ívið lengur að en í fyrra enda magnið miklu meira. Lokahnykkurinn var að mestu frá einum bæ sem hélt eftir gimbrunum eftir til þess að rýja þær.“

Meðalvigt dilka var nánast sú sama og í fyrra, 15,19 kg en var 15,20 kg á síðsta ári. Fitugildi nú var 6,42 en 6,34 í fyrra og kjötgildi var hærra en í síðustu sláturtíð 8,17 nú en var 8,09 í fyrra.