Fjöldi fyrirtækja gefur kjöt
Kjöt frá Norðlenska er í fjölda jólapakka fyrirtækja til starfsmanna sinna að þessu sinni eins og mörg undanfarin ár. „ Þetta hefur verið mjög vinsælt og er enn,” segir Ingvar Gíslason, markaðsstjóri Norðlenska.
Fyrirtæki um allt land nýta sér þá þjónustu Norðlenska að pakka kjötinu í fallegar gjafakörfur. Þær eru mismunandi en KEA hamborgarhryggur og KEA hangikjöt er í mörgum, jóla-salami, hreindýrapaté eða annars konar álegg.
„Mér sýnist meira um hamborgarhryggi en oft áður en líka er mikið um að fyrirtæki gefi hangikjöt,” segir Ingvar.
Pökkun gjafanna hófst í síðustu viku og þeir fyrstu voru sendir út fyrir helgina.
Rakel Hönnudóttir og Gísli Björgvin Gíslason hafa verið að pakka inn gjöfum síðustu daga og fljótlega bætast fleiri í hópinn.