Góðir gestir frá USA í heimsókn hjá Norðlenska
Útflutningur til Bandaríkjanna er hafinn af fullum krafti og hafa þegar verið send utan um 46 tonn af unnu lambakjöti. Í síðastliðinni viku komu gestir frá Whole Foods í Bandaríkjunum í heimsókn til Norðlenska.
Hópurinn sem samanstóð af 13 verslunar og kjötkaupmönnum Whole Foods verslananna skoðaði sláturhúsið og vinnsluna á Húsavík. Mikil ánægja ríkti meðal fólksins um allan aðbúnað til vinnslu og slátrunar hjá Norðlenska. Að lokinni vel heppnaðri heimsókn var haldið með hópinn í Mývatnssveit. Hópurinn snæddi hádegismat í fjósinu hjá Ólöfu í Vogum þar sem aðeins voru á boðstólnum afurðir ræktaðar á býlinu. Að því loknu var haldið að bænum Garði 1 þar sem búskapurinn hjá Halldóri í Garði var skoðaður. Bandarísku gestirnir fengu meðal annars að smakka á reyktri bleikju sem veidd er í Mývatni og reykt á bænum. Að endingu fór hópurinn í skoðunarferð um Mývatn og skolaði meðal annars af sér ferðaþreytuna í Jarðböðunum í Mývatnssveit. Það var því þreyttur en ánægður hópur Bandaríkjamanna sem hélt suður yfir heiðar á vit nýrra ævintýra þar.
