Fréttir

Árleg smökkun matgæðinga DV á hamborgarhryggjum fór fram í gær og er niðurstaðan birt í DV í dag. Prófaðir voru hamborgarhryggir frá níu framleiðendum og að mati matgæðinganna þótti KEA hamborgarhryggurinn sá besti.....

Árleg smökkun matgæðinga DV á hamborgarhryggjum fór fram í gær og er niðurstaðan birt í DV í dag.  Prófaðir voru hamborgarhryggir frá níu framleiðendum og að mati matgæðinganna þótti KEA hamborgarhryggurinn sá besti.....
     KEA hamborgarhryggurinn fékk 14 stjörnur af 15 mögulegum.  Það voru þau Úlfar Eysteinsson matreiðslumeistari, Sigurlaug Jónasdóttir útvarpskona og Örn Árnason leikari sem sáu um einkunnagjöfina.   Erni þótti KEA hamborgarhryggurinn "mjög þéttur og góður. Reykbragðið gott og fitan líka."  Örn og Sigurlaug gáfu KEA hamborgarhryggnum fullt hús stiga eða 5 stjörnur og Úlfar gaf honum 4 stjörnur.
     Nóatúns hamborgarhryggurinn sem Norðlenska framleiðir fyrir verslanir Nóatúns hafnaði í 3 sæti með 12 stjörnur og hlaut meðal annars fullt hús stiga hjá Úlfari.
     Bautabúrs hamborgarhryggurinn sem oftar en einu sinni hefur sigrað í könnun matgæðinganna hlaut afbragðs ummæli þeirra og 10 stjörnur.  Sagði Úlfar meðal annars um hrygginn "Þetta er bragðgóður hryggur.  Sneiðin er þétt en um leið safarík"
    Þegar rýnt er í vigtartölur á hamborgarhryggjum eftir suðu kemur í ljós að framleiðsluvörur Norðlenska koma afar vel út hvað suðurýrnun varðar.  KEA hamborgarhryggurinn rýrnaði um 14,6%, Bautabúrshamborgarhryggurinn um 8,1% og Nóatúns hamborgarhryggurinn rýrnaði um 11,2%.  Suðurýrnun annarra framleiðenda var allt upp í 24,6%.
    Niðurstaðan er enn ein rósin í hnappagat kjötmeistara Norðlenska og viðurkenning á því mikla gæðastarfi sem unnið er hjá fyrirtækinu.