Í hátíðarbúningi í úrbeiningunni á Húsavík
19.12.2007 - Lestrar 478
Undanfarin ár hefur skapast sú hefð hjá úrbeiningarmönnum Norðlenska á Húsavík, sem úrbeina allt
hangikjötið frá Norðlenska sem landsmenn sporðrenna fyrir jólin, að síðustu vikuna fyrir jól fari þeir í betri
fötunum í vinnuna, meira að segja með bindi! Úrbeiningarmennirnir hafa ekki brugðið út af vananum í ár.
Á þessum síðustu dögum fyrir jól eru strákarnir í úrbeiningunni loksins farnir að sjá til sólar, ef svo má að orði komast. Að baki er hin árlega vinnutörn hjá þeim við að úrbeina læri og framparta í allar hangikjötsrúllurnar sem verða á hátíðarborðum landsmanna. Fyrir þessi jól hafa úrbeiningarmennirnir úrbeinað á annað hundrað tonn af kjöti í þessum tilgangi og því er full ástæða til þess að þessari jólatörn sé fagnað með því að bregða sér í betri fötin.
Á meðfylgjandi mynd eru úrbeiningarmenn á Húsavík með bindi um háls og hangilæri milli handanna.