Ingvar í stjórn færeysk-íslenska viðskiptaráðsins
Ingvar Már Gíslason, markaðsstjóri Norðlenska, var kjörinn í stjórn Færeysk-íslenska viðskiptaráðsins á stofnfundi þess um síðustu helgi. Um 40 fyrirtæki gerðust stofnaðilar. Ráðinu er ætlað að styrkja enn frekar samskipti þjóðanna á sviði verslunar og viðskipta, vera vettvangur til að stofna til nýrra kynna og tækifæra sem og almennra skoðanaskipta. Níu eru í stjórn, fimm Færeyingar og fjórir Íslendingar.
Færeyskir fulltrúar í viðskiptaráðinu eru 20 og þeir íslensku ámóta margir, fyrirtæki, stofnanir
og einstaklingar. Fastlega er reiknað með að fleiri bætist fljótlega í hópinn enda margir sýnt því áhuga. Stjórnarmenn eru þessir: Marita Rasmussen frá Føroya Arbeiðsgevarafelag, Debes Petersen frá Kemilux, Eyðun Joensen frá Poul Hansen,
Jóhanna á Bergi frá Faroe Ship og Hendrik Egholm frá Magn. Frá Íslendi eru í stjórn, Gísli Gíslason frá
Faxaflóahöfnum sem jafnframt er formaður, Ingvar Már Gíslason frá Norðlenska, Hjálmar Waag Arnason frá Keili og Þorgeir Baldursson
frá Kvos/Odda.
„Norðlenska hefur átt farsæl viðskipti við færeysk fyrirtæki frá stofnun fyrirtækisins og því er það okkur
mikilvægt að taka þátt í stofnun viðskiptaráðsins, við viljum efla enn frekar samstarf þjóðanna og teljum vera mikla möguleika
fyrir íslensk og færeysk fyrirtæki til gagnkvæmra viðskipta,“ segir Ingvar Már Gíslason.
