KEA hamborgarhryggurinn bestur að mati sérfræðinga DV
Hamborgarhryggurinn er einn vinsælasti hátíðarmatur Íslendinga, eins og segir í umfjöllun DV í dag, og fenginn var góður hópur af matreiðslumönnum til að smakka hann í ár. Í dómnefndinni sátu Björgvin Mýrdal, yfirmatreiðslumaður á Hótel Búðum, Eiríkur Ingi Friðgeirsson, Gallery Restaurant, Hótel Holti, Gissur Guðmundsson, forseti Heimssamtaka matreiðslumanna, Jakob H. Magnússon, matreiðslumeistari á veitingahúsinu Horninu, Hrefna Rósa Sætran, matreiðslumaður og veitingahúseigandi, og Þráinn Freyr Vigfússon, yfirmatreiðslumaður á Kolabrautinni í Hörpu.
Gáfu einkunn frá 0 til 10
DV segir í dag: „Bragðkönnunin fór fram með þeim hætti að DV fór í verslanir á höfuðborgarsvæðinu og keypti 11 tegundir af hamborgarhryggjum. Kjötið var eldað daginn fyrir smökkunina og borið fram kalt á númeruðum bökkum, þannig að ekki var nokkur leið fyrir dómnefndina að vita um hvaða framleiðanda var að ræða. Með þessu fengu dómararnir laufabrauð, malt og appelsín, auk þess sem vatn var á boðstólum. Dómararnir gáfu hverjum hamborgarhrygg einkunn á bilinu 0 til 10. Einnig voru hryggirnir vigtaðir fyrir og eftir suðu og mælt hve mikið þeir rýrnuðu.“
