Kjöt frá Norðlenska á breskan neytendamarkað
Lambakjöt frá Norðlenska verður fljótlega boðið til sölu á neytendamarkaði í London, bæði frosin læri og hryggir. Um er að ræða hinn víðfræga Smithfield markað, sem starfræktur hefur verið í hundruð ára.
„Við höfum selt kjöt á Smithfield markaðinn, en eingöngu til kjötvinnsla þar sem vinna úr því og selja,“ segir Reynir B. Eiríksson framleiðslustjóri Norðlenska. „Nú hefur verið óskað eftir því að lambakjöt frá okkur verði selt í neytendaumbúðum á Smithfield markaðnum og frosin læri og hryggir verða komin þar í sölu fljótlega undir merki Goða - eins af vörumerkjum Norðlenska.“
Breska fyrirtækið sem selja mun lamabakjötið beint til neytenda á markaðnum hyggst einnig bjóða það til sölu á heimasíðu sinni. Ekki er enn ljóst um hve mikið magn verður að ræða.
