Langir vinnudagar en allir með bros á vör
„Áætlanir okkar í sambandi við magn og afgreiðslu gengu virkilega vel upp og við erum mjög sátt hvernig til tókst,” segir Sigmundur Hreiðarsson stöðvarstjóri Norðlenska á Húsavík, spurður út í saltkjötsvertíðina vegna sprengidagsins. Hann gerir ráð fyrir að um 150.000 manns borði saltkjöt frá Norðlenska í dag.
„Það er ljóst að söludeild og framleiðslan hafa unnið mjög vel saman að þessu verkefni, enda vant og gott starfsfólk á báðum stöðum,” segir Sigmundur. „Hér í framleiðslunni tókst fólk á við þetta verkefni með bros á vör, þrátt fyrir að dagarnir hafi verið í lengra lagi og þó nokkur pressa á köflum, en eins og einn sagði þá er þetta bara gaman í góðum félagsskap.”