Meiri sala og afkoma í takt við áætlanir á árinu 2007
Reksturinn yfir væntingum
"Rekstur Norðlenska á árinu 2007 stefnir í að verða heldur betri en áætlað var, bæði í sölu og afkomu. Ég tel að
sú stefna okkar að auka vörugæði í framleiðslu fyrirtækisins hafi skilað okkur betri ímynd inn á markaðinn. Salan hefur aukist
í öllum vörutegundum og í raun hefðum við getað selt meira, en okkur vantaði einfaldlega hráefni. Það var skortur á nauta- og
grísakjöti allt síðasta ár," segir Sigmundur E. Ófeigsson, framkvæmdastjóri Norðlenska.
"Við höfum á undanförnum árum og misserum verið að bæta okkar rekstur með hagræðingu á öllum sviðum og það hefur
skilað sér. Að hluta höfum við tekið á okkur hækkun sem hefur orðið á gripum og því hafa þær ekki að fullu
farið út í verðlagið til neytenda. Engu að síður erum við að sjá batnandi rekstur í fyrirtækinu, sem er mjög
ánægjulegt. Það er alltaf hægt að gera betur og við munum halda áfram að leita hagræðingar á öllum sviðum í
rekstrinum, en engu að síður höfum við nú þegar náð mjög góðum árangri.
Við erum þessa dagana að ljúka gerð áætlunar fyrir árið 2008 og samkvæmt henni gerum við ráð fyrir óverulegum breytingum
í rekstrinum miðað við síðasta ár. Við teljum að töluverð óvissa sé núna á kjötmarkaði. Fóður
hækkaði á síðasta ári og nú liggur fyrir 5-7 prósent hækkun á því til viðbótar. Sömuleiðis munu koma
fram hækkanir á áburði á vordögum. Við munum taka á með framleiðendum varðandi þessar hækkanir og það mun að
sjálfsögðu koma að einhverju leyti við okkar rekstur. Það er ljóst að hækkun á kornverði helgast m.a. af því að margar
þjóðir eru farnar að nýta kornið til framleiðslu á eldsneyti, svokölluðu líf-dísel."
Horfur fyrir 2008
Hvað horfur fyrir þetta ár varðar segir Sigmundur að framboðið á nautgripum til slátrunar hafi heldur verið að aukast og því megi
vænta að jafnvægi náist á nautakjötsmarkaðnum á árinu. Ekki sé að vænta aukningar í
svínakjötsframleiðslunni, raunar hafi einn framleiðandi á þessu svæði, Arnarfellsbúið í Eyjafjarðarsveit, hætt rekstri. Hins
vegar séu svínabændur á svæðinu að kanna möguleikann á stækkun búa sinna. "Það er ljóst að að við munum
ekki sjá aukningu í framboði á svínakjöti hér á þessu ári og það er áhyggjuefni, enda þyrftum við, ef vel
á að vera, að fá töluvert meira svínakjöt. Við leggjum áherslu á að sinna okkar föstu viðskiptavinum, en skortur á
svínakjöti hamlar frekari vexti í sölu á svínakjöti, sem við teljum að við hefðum alla möguleika á.
Varðandi lambakjötið tel ég að sé töluverð óvissa. Útflutningsskyldan mun detta út eftir þetta ár. Sú spurning vaknar
hvernig við því verður brugðist, því til þessa hafa verið flutt út um 1200 tonn af lambakjöti árlega, sem eru umfram neyslu á
innanlandsmarkaði. Sala á lambakjöti hefur eilítið verið að gefa eftir á síðustu mánuðum. Ein af ástæðunum fyrir
því tel ég vera að neytendur gera síaukna kröfu um að fá fullunna vöru. Tíminn sem fer í að elda á heimilum landsins er
alltaf að verða styttri og því er í auknum mæli gerð krafa um hálftilbúna eða tilbúna rétti. Lambið hentar ekki eins vel til
þess að mæta þessum kröfum eins og til dæmis svína- og kjúklingakjöt. Auðvitað er stöðugt í gangi
vöruþróun í lambakjötinu til þess að mæta þessum auknu kröfum markaðarins, en það má segja að lausnirnar séu
ekki auðfundnar. Sem dæmi má nefna að á pizzastöðunum fer lítið fyrir lambakjöti. Nautahakkið hefur skapað sér hefð ofan
á t.d. pizzurnar og þeirri hefð verður ekki svo auðveldlega breytt. Sú áhersla hefur verið nokkuð ríkjandi að selja lambakjötið
í hlutuðum skrokkum og núna þegar þróunin á markaðnum er hröð í þá átt að neytendur vilji
hálftilbúna eða tilbúna rétti virðist lambakjötið sitja eftir. Þrátt fyrir þetta tel ég að ef rétt er á
málum haldið í vöruþróun og markaðsmálum muni tími lambakjötsins koma, enda er það hollustuvara. Lambið lifir nær
eingöngu á villtum gróðri í úthaga, þ.e. ekki á ábornum túnum, og þessi staðreynd tel ég að muni skipta
máli þegar til lengri tíma er litið. En vaxtarhraði lambsins er auðvitað mun lengri en í t.d. hvíta kjötinu og þess vegna verður
það alltaf dýrara í framleiðslu.
Útflutningsmál
Norðlenska hefur sem kunnugt er dregið sig út úr útflutningi á Bandaríkjamarkað, enda gekk hann einfaldlega ekki vegna sterkrar stöðu gagnvart
dollar. "Við fáum hins vegar ítrekaðar fyrirspurnir frá Bandaríkjunum um kjöt, en við treystum okkur ekki til þess að verða við
óskum um útflutning á þann markað að óbreyttri stöðu dollars. Við höfum hins vegar verið að flytja út á aðra
markaði. Færeyjar hafa til dæmis reynst góður markaður. Færeyingar nýta stóran hluta af sínu lambakjöti í vinnslu á
skerpikjöti og því þarf að anna eftispurn þar eftir hefðbundnu lambakjöti. Hins vegar er Færeyjamarkaður lítill og vaxtarmöguleikar
takmarkaðir. Í Noregi hefur framleiðsla á lambakjöti dregist saman og um leið hafa opnast þar möguleikar til útflutnings á viðunandi
verðum. Þá höfum við flutt út töluvert af slögum til Bretlands, þar sem þau eru notuð í kebab."
Framleiðslueiningarnar munu stækka
Sigmundur telur að margt bendi til þeirrar þróunar í kjötframleiðslu að
framleiðslueiningarnar muni stækka. Að sama skapi megi gera ráð fyrir að vinnslustöðvunum muni fækka, enda verði alltaf erfiðara og erfiðara
fyrir minni sláturhús og kjötvinnslur að verða við kröfum markaðarins um fullunnar vörur og einnig að uppfylla reglugerðir og staðla, sem
oftar en ekki eigi rætur að rekja til Evrópusambandsins.
Breytingar á eignarhaldi Norðlenska
Búsæld eignaðist Norðlenska að fullu undir lok ársins 2007, sem kunnugt er. "Í þessum breytingum á eignarhaldi tel ég að felist
ýmis tækifæri fyrir fyrirtækið. Norðlenska kemur til með að vinna nánar með framleiðendum að auknum vörugæðum og að
uppfylla kröfur markaðarins. Með því að Búsæld hefur eignast öll hlutabréf í Norðlenska verða tengsl framleiðenda við
markaðinn nánari.
Á sínum tíma settu menn sér það markmið að Búsæld eignaðist Norðlenska að fullu. Margir höfðu efasemdir um að
þessu markmiði væri unnt að ná og ég skal viðurkenna að við stjórnendur fyrirtækisins vorum efins, í ljósi þess hversu
hratt fyrirtækið stækkaði, að bændum tækist að eignast allt rekstrarfélagið. En nú er það sem sagt í höfn.
Það ríkir traust á milli fyrirtækisins og bænda og til marks um það sýnir viðhorfskönnun sem við létum gera fyrir okkur
meðal innleggjenda hjá Norðlenska, bæði þeirra sem eru samningsbundnir innan Búsældar og þeirra sem standa utan Búsældar, að
meginþorri þeirra, eða yfir 90%, hafa jákvætt viðhorf gagnvart fyrirtækinu og hafa á því traust."
Nú eru um 530 bændur í Búsæld og eru þannig bundnir samningi um innlegg hjá Norðlenska. Alls voru innleggjendur hjá félaginu hins vegar
um 700 á síðasta ári. "Innleggjendum hefur verið að fjölga og eftir að gengið var frá kaupum Búsældar á öllum
hlutabréfum í Norðlenska finnum við fyrir auknum áhuga bænda á að koma að félaginu."
Hjá Norðlenska starfa 170-180 manns, þar af sem næst 110 á Akureyri, um 50 á Húsavík, 8 á Höfn og 6 í Reykjavík.