Skemmtilegt starf
"Mér finnst þetta skemmtilegt og áhugavert starf. Það er sérstaklega skemmtilegt að vinna að þróun nýrra vörutegunda," segir Rúnar Ingi Guðjónsson, starfsmaður Norðlenska, sem nýlega lauk námi í kjötiðn.
"Ég tók á sínum tíma grunndeild matvælabrautar við Verkmenntaskólann hér, enda stefndi ég að því að verða kokkur. En smám saman varð ég afhuga því, ekki síst vegna vinnutíma kokkanna og í október 2004 hóf ég að vinna hér hjá Norðlenska og fljótlega fékk ég áhuga á því að verða kjötiðnaðarmaður og fór á samning hér. Meistarinn minn hér hefur verið Leifur Ægisson og hann hefur kennt mér fjölmargt sem nýtist vel í framtíðinni," segir Rúnar Ingi, sem er 21 árs Akureyringur.
"Það er margt í þessu starfi sem hefur komið skemmtilega á óvart. Sannast sagna vissi ég ekki mikið um hvað ég var að fara út í á sínum tíma. En þetta er mjög áhugavert starf og ég stefni á að fara í frekara nám á þessu sviði, að ljúka meistaranum. Áður en að því kemur ætla ég þó að vinna hér í það minnsta eitt ár," segir Rúnar Ingj, en náminu lauk hann af matvælabraut Menntaskólans í Kópavogi og þurfti því að vera syðra frá síðustu áramótum og fram á vor til þess að ljúka bóklega hlutanum. Í kjötiðnaðarnáminu taka nemendur sömu grunnfög og allir aðrir framhaldsskólanemar - t.d. ensku, dönsku, stærðfræði og íslensku - og síðan eru kenndar ýmsar fagreinar auk verklegra æfinga.
"Það eru því miður alltof fáir nemar í þessu í dag og þess vegna er mikill skortur á fagmenntuðum kjötiðnaðnaðarmönnum. Ég hvet ungt fólk til þess að gefa þessu námi gaum, bæði strákum og stelpum," segir Rúnar Ingi Guðjónsson.