Tugir tonna af súrmat
Bóndadagurinn nálgast og starfsmenn Norðlenska eru því í óða önn að gera súrmatinn kláran. Margir byrja reyndar að borða þetta lostæti áður en Þorrinn gengur formlega í garð og því hefur töluvert þegar verið sent í verslanir. Eggert Sigmundsson vinnslustjóri segir fyrirtækið selja tugi tonna af súrmat að þessu sinni eins og undanfarin ár.
Skammt er stórra högga á milli. Jólahátíðinni nýlokið og Þorrinn hefst með Bóndadegi á föstudaginn í næstu viku, 22. janúar.
Starfsmenn Norðlenska byrja að sjóða í súr í september og unnið hefur verið að Þorramatnum allar götur síðan. Allt hið hefðbundna er í boði: pungar, slátur, sviðasulta, lundabaggar, bringur; og að sjálfsögðu nýtt slátur og sultur auk hangikjötsins sem flestum finnst ómissandi.
María Fríða Bertudóttir kjötiðnaðarnemi og Jón Knútsson, sem borið hefur hitann og þungann af súrmatnum, skera hér niður punga í gríð og erg.
„Það er allt komið á fullt í afgreiðslu á Þorramatnum. Hann rýkur út,” segir Eggert Sigmundsson.