Fréttir

Norðlenska afhenti Samhljómi styrktarfélagi á Húsavík í dag fimmtán matarpoka, sem verður útdeilt til heimila á Húsavík sem þurfa á aðstoð að halda núna fyrir jólin.

Í hverjum poka eru KEA-hamborgarhryggur (sem matgæðingar DV völdu besta hrygginn núna fyrir jólin), Húsavíkurhangikjöt (sem matgæðingar DV völdu einnig besta hangikjötið á markaðnum fyrir jólin), grænar og gular baunir, rauðkál og Nóa-konfekt.

Í stað þess að senda út jólakort hefur Norðlenska undanfarin ár varið ákveðinni fjárupphæð til þess að styrkja félagasamtök á þeim stöðum þar sem fyrirtækið er með starfsstöðvar - Akureyri, Húsavík og Höfn - og í ár var röðin komin að Húsavík.

Sigmundur Hreiðarsson, vinnslustjóri Norðlenska á Húsavík, sagði það fyrirtækinu mikið gleðiefni að geta styrkt starf Samhljóms styrktarfélags með þessum hætti, en tilgangur félagsins er að leggja einstaklingum lið sem lenda í fjárhagserfiðleikum vegna utanaðkomandi áfalla, s.s. veikinda, fötlunar eða annarra ástæðna.

Stjórn Samhljóms og fulltrúar Karlaklúbbsins Sófíu á Húsavík veittu matarpokunum viðtöku, en Sófíu-menn hafa verið ötulir bakhjarlar Samhljóms undanfarin ár, ekki síst í tengslum við styrktartónleika sem haldnir hafa verið fyrir hver jól. Styrktartónleikarnir í ár voru haldnir sl. sunnundag og tókust afar vel.

Stjórnarmenn í Samhljómi og Sófíu-menn þökkuðu Norðlenska sérstaklega fyrir matarpokana og sögðu þá eins og himnasendingu núna fyrir jólin.

Fulltrúar Norðlenska ásamt stjórnarmönnum í Samhljómi og fulltrúum Karlaklúbbsins Sófíu með matarpokana fimmtán, sem verður útdeilt til skjólstæðinga Samhljóms.

Guðni Bragason, formaður Samhljóms og Arnar Guðmundsson, kjötiðnaðarmeistari
skoða matarpokann.

Arnar Guðmundsson, kjötiðnaðarmeistari, gaf gestum flísar af ilmandi sauðakjöti.