Sendiráðin hjálpa til
Þorramatur er í vaxandi mæli fluttur til útlanda fyrir bóndag. Rætt var við Ingvar Gíslason, markaðsstjóra Norðlenska, um málið í fréttum Ríkissjónvarpsins í gærkvöldi þar sem fram kom að stór Íslendingafélög séu stærstu kaupendurnir.
Útflutningur kjöts, hvað þá Þorramatar, er háður ströngum skilyrðum og ekki hlaupið að því að senda þessar afurðir milli landa. Þar koma hins vegar sendiráð Íslands til sögunnar.
„Það er gott að eiga góða að í sendiráðum Íslendinga á Norðurlöndunum og þau aðstoða félögin. Þetta er alls ekkert einfalt og merkingar þurfa að vera í mjög góðu lagi. Menn geta rétt ímyndað sér þegar verið er að merkja á ensku þessar íslensku vörur að það geta runnið tvær grímur á tolverðina þegar þeir taka upp pakkana,” sagði Ingvar í samtali við Helga Seljan á RÚV. Á hann þar líklega fyrst og fremst við súrsaða hrútspunga!