Útflutningur dilkakjöts mikilvægur bæði bændum og afurðastöðvum
„Það er alveg ljóst að það er og verður nauðsynlegt að flytja út lambakjöt. Við reiknum með að halda áfram útflutningi á svipuðum nótum til Færeyja, Bretlands og væntanlega einnig Noregs. Að okkar mati er afar mikilvægt að halda okkar stöðu á þessum mörkuðum, auk þess sem við höfum verið að skoða möguleika á útflutningi inn á nýja markaði," segir Sigmundur E. Ófeigsson, framkvæmdastjóri Norðlenska.
„Þessi lága skráning á krónunni hefur óneitanlega skapað okkur tækifæri til útflutnings, en samt sem áður er ekki auðvelt við þetta að eiga, enda er kreppan víðar en á Íslandi og lambakjötið er hvergi ódýrasta kjötið. Í kreppu er staðreynd að fólk leitar í ódýrari matvæli. Við höfum séð glögg merki um þetta hér heima. Sem dæmi hefur svínakjötið lækkað í verði á síðustu mánuðum vegna offramboðs og það hefur strax komið fram í samdrætti í sölu á lambakjöti. Í mínum huga liggur alveg ljóst fyrir að til þess að mögulegt sé að hafa áfram svipaða framleiðslu á lambakjöti í landinu verður að flytja út umtalsvert magn. Eins og staðan er í dag er þörfin fyrir útflutning á lambakjöti tæp tvö þúsund tonn á ári og mögulega þyrfti hann að vera meiri núna til þess að ná endum saman vegna sölusamdráttar á innanlandsmarkaði. Að óbreyttu er í raun aðeins tvennt í stöðunni; annað hvort verði dregið úr lambakjötsframleiðslunni eða lögð áhersla á útflutninginn og það ætlum við að gera," segir Sigmundur.
Umtalsverður útflutningur til Færeyja
Ingvar Már Gíslason, markaðsstjóri Norðlenska, segir að fyrirtækið hafi
náð góðum árangri með framleiðsluvörur sínar í Færeyjum, enda sé þar mikil hefð fyrir neyslu á lambakjöti.
„Við seljum umtalsvert magn af lambakjöti til Færeyja, t.d. læri, hryggi, súpukjöt og saltkjöt. Þessi markaður skiptir okkur því
miklu máli og við munum áfram leggja mikla áherslu á hann," segir Ingvar.
Garnir fluttar út á ný
Að sögn Reynis Eiríkssonar, framleiðslustjóra Norðlenska, verða garnir fluttar út á nýjan leik í haust, en nokkurra ára uppihald
hefur verið í þeim útflutningi. Ástæðan er einfaldlega sú að vegna lágs gengis krónunnar borgar þessi útflutningur sig
á ný. Þá segir Reynir að unnið sé að því að skoða nýja mögulega markaði fyrir sauðfjárafurðir, en of
snemmt sé að segja hvað út úr þeim þreifingum komi.