Vel heppnaður Kjötsúpudagur
Opið hús var hjá Norðlenska fyrsta vetrardag, en sá dagur hefur verið tilnefndur af Markaðsráði Kindakjöts sem dagur Kjötsúpunnar.
Gestum og gangandi var boðið upp á alíslenska Kjötsúpu sem mæltist vel fyrir hjá þeim tæplega 1000 manns sem þáðu heimboðið.
Starfsemi var í fullum gangi á Marel úrbeiningarlínunni þar sem gestum gafst kostur á að kynna sér framleiðslu á afurðum Norðlenska.
Óhætt er að segja að dagurinn hafi lukkast vel og var veður með besta móti. Á þriðja hundrað lítrar af kjötsúpu runnu ofan í gestina sem margir höfðu á orði að aldrei yrði annað á borðum en Kjötsúpa þennan dag. Yngri kynslóðin hafði nóg fyrir stafni og gat meðal annars brugðið sér í kassaklifur og hoppað í hoppkastala. Börnin létu sitt ekki eftir liggja í að bragða á súpunni og kom það mörgum þeirra á óvart hversu bragðgóður og hollur matur súpan væri.
Mikil hrifning var meðal gesta sem fóru í skoðunarferð um fyrirtækið, sérstaklega vakti úrbeiningarlínan mikla athygli enda hafa verið miklar tækniframfarir í vinnslu og pökkun á kjöti síðustu árin. Margir hverjir sem komu í heimsókn höfðu starfað í kjötvinnslum á sínum yngri árum, því voru það mikil viðbrigði fyrir þann hóp að sjá hvernig tækninni hafði fleygt fram. Sérstaklega var haft á orði hversu mikil gæðin væru orðin á kjötafurðum þar sem meðhöndlun á hráefni er öll til fyrirmyndar.
Það er von Norðlenska að allir hafi haft ánægju af kjötsúpudeginum og eru allar líkur á að þessi dagur sé kominn til að vera.
Hægt er að sjá myndir frá deginum hér á heimasíðunni.
