Fréttir

Einar Karlsson sláturhússtjóri Norðlenska á Höfn er mjög ánægður með hvernig sláturtíðin hefur gengið fram að þessu. „Við byrjuðum 18. september og eftir daginn í dag þykjumst við verða búnir með 16.600 lömb. Það er um það bil helmingur,“ segir Einar í morgun.

Margir útlendingar eru við störf á Höfn nú eins og undanfarin haust. „Heimamenn eru ekki til,“ segir Einar þegar kemur að því að ráða fólk til starfa í sláturtíðinni, en tekur fram að hann sé sérdeilis ánægður með hina erlendu starfsmenn. „Þetta er mjög fínt fólk.“

Fé er töluvert vænna nú en síðustu ár, að sögn Einars. „Meðalvigtin er mikið betri. Ég gæti ímyndað mér að munurinn sé eitthvað á annað kíló,“ segir Einar.