Nýjustu fréttir

Ingvar Gíslason markaðsstjóri Norðlenska kom færandi hendi á Sjúkrahúsið á Akureyri í dag og afhenti barnadeild FSA 100.000 krónur frá fyrirtækinu. Þetta er sjöunda árið í röð sem Norðlenska hefur þann háttinn á að senda ekki jólakort heldur færa stofnun eða samtökum mat eða peninga að gjöf.

Húsavíkurhangikjötið frá Norðlenska þótti skara fram úr, þriðja árið í röð, í árlegri bragðkönnun DV sem birt var í vikunni. Það hlaut 8 af 10 mögulegum hjá reyndum matgæðingum, sem sumir hverjir hafa áralanga reynslu af því að smakka mat.

Gera má ráð fyrir því að allir Íslendingar borði hátíðarmat frá Norðlenska oftar en einu sinni um jólin, nú sem endranær. Þetta segir Ingvar Gíslason markaðsstjóri fyrirtækisins. Hann segir Norðlenska njóta mikils trausts meðal almennings. Fólk vilji vera öruggt um að það njóti gæðavöru um hátíðarnar „og treystir okkur í því efni. Fyrir það erum við auðvitað bæði stolt og þakklát,“ segir Ingvar.