Nýjustu fréttir

Í ljósi frétta fyrir helgi um hræringar á kjötmarkaði skal það áréttað að KEA, eitt og sér, hefur ekki áform um að selja eignarhlut sinn í Norðlenska matborðinu ehf. enda er KEA aðili að hluthafasamkomulagi við Búsæld ehf. (félag innleggjenda hjá Norðlenska) og það samkomulag gerir m.a. ráð fyrir tiltekinni umgjörð um eignarhald og þróun á eignarhaldi þessara tveggja stærstu hluthafa Norðlenska matborðsins ehf.

Stjórnarformaður og starfsmaður Búsældar boðuðu til funda með bændum á suður og austurlandi. Á fundunum voru auk þeirra Búsældarmanna, þrír frá Norðlenska. Haldnir voru alls fimm fundir sem tókust með ágætum. Fundarefnið var sláturtíðin sem var að ljúka auk þess sem málefni Búsældar og Norðlenska voru einnig til umræðu.

Opin dagur var haldinn hjá Norðlenska á Húsavík síðastliðin Laugardag. Húsvíkingum og nærsveitarmönnum var boðið í heimsókn og þáðu um 350 manns að kynnast starfsemi fyrirtækisins á Húsavík. Boðið var upp á kynningarferð um fyrirtækið þar sem öll starfsemin á Húsavík var kynnt ásamt því að gestir fengu að gæða sér á gómsætri kjötsúpu undir ljúfum tónum trúbadorsins Sigurðs Illugasonar. Börnin höfðu nóg fyrir stafni og gátu meðal annars brugðið á leik í hoppikastala og farið í andlitsmálum að auki voru þau leyst út með góðum gjöfum frá Norðlenska.