Nýjustu fréttir

Opið hús var hjá Norðlenska fyrsta vetrardag, en sá dagur hefur verið tilnefndur af Markaðsráði Kindakjöts sem dagur Kjötsúpunnar. Gestum og gangandi var boðið upp á alíslenska Kjötsúpu sem mæltist vel fyrir hjá þeim tæplega 1000 manns sem þáðu heimboðið. Starfsemi var í fullum gangi á Marel úrbeiningarlínunni þar sem gestum gafst kostur á að kynna sér framleiðslu á afurðum Norðlenska. Óhætt er að segja að dagurinn hafi lukkast vel og var veður með besta móti. Á þriðja hundrað lítrar af kjötsúpu runnu ofan í gestina sem margir höfðu á orði að aldrei yrði annað á borðum en Kjötsúpa þennan dag. Yngri kynslóðin hafði nóg fyrir stafni og gat meðal annars brugðið sér í kassaklifur og hoppað í hoppkastala. Börnin létu sitt ekki eftir liggja í að bragða á súpunni og kom það mörgum þeirra á óvart hversu bragðgóður og hollur matur súpan væri.

Hér á bændavef Norðlenska er nú hægt að taka gögn er varða innlegg sauðfjárbænda, beint inn í Fjárvís, slóðin er http://www.nordlenska.is/index.asp?opna=medaltolur_innskra Fjárvís er forrit fyrir sauðfjárbændur, sem vilja hafa góða yfirsýn yfir fjárbúskapinn. Skýrsluhald búsins er hægt að færa beint í tölvuna af bændavefnum. Þannig er á auðveldan og þægilegan hátt hægt að skilað gögnum til Bændasamtakanna á tölvutæku formi í stað handskrifaðra fjárbóka. Þetta eykur skilvirkni og öryggi gagna, sem send eru í landsuppgjör. Ef að innleggjendur eru ekki komin með notandanafn og lykilorð inn á bændavefinn, er hægt að nálgast það á skrifstofu Norðlenska í síma 460-8800.

Norðlenska býður landsmönnum að koma og skoða starfsemi fyrirtækisins á Akureyri á fyrsta vetrardag laugardaginn 22. október. Jafnframt er öllum gestum boðið upp á að gæða sér á ekta íslenskri kjötsúpu. Börnunum verður boðið upp á kassaklifur. Opið hús Norðlenska er í samstarfi við KEA og Landsbankann. Að sögn Ingvars Más Gíslasonar, markaðsstjóra Norðlenska, stendur Markaðsráð kindakjöts annað árið í röð fyrir súpukjötsdeginum á fyrsta degi vetrar. Þann dag hefur Markaðsráð tilnefnt sem hinn Íslenska súpukjötsdag og hvetur landsmenn til að gæða sér á íslenskri kjötsúpu. Við tökum að sjálfsögðu þátt í þessu átaki og um leið ætlum við að kynna Akureyringum og nærsveitamönnum og landsmönnum öllum starfsemi okkar hér á Akureyri með opnu húsi frá kl. 13 til 16 nk. laugardag, 22. október. Þetta höfum við ekki gert áður, en við teljum fulla ástæðu til þess að gefa fólki kost á að kynna sér starfsemi okkar og sjá meðal annars hversu fullkomin og tæknivædd kjötvinnsla Norðlenska er orðin.