Nýjustu fréttir

Talsverð viðbrögð hafa verið hjá sauðfjárbændum vegna verðskrár Norðlenska sem birt var í síðustu viku. Óskir bænda hafa að mestu verið á einn veg, að verðmunur á milli tímabila verði minnkaður. Það er ljóst að ekki er tilefni til þess að hækka vegið meðalverð fyrir sauðfé þetta haust, eins og fram hefur komið. Til þess að koma til móts við óskir bænda eins og kostur er, er því ljóst að verð lækkar á ákveðnum tímabilum en hækkar aftur á móti á öðrum. Þá hefur tímabilum verið breytt þannig að frá 30. september verður sama verð út sláturtíðina.

Norðlenska hefur tekið ákvörðun um verðlagningu sauðfjárafurða fyrir haustið 2010. Niðurstaðan er sú að greiða svipað verð og á síðasta ári fyrir dilkakjöt, að frádregnum 39 krónum vegna geymslugjalds, sem fram til þessa hefur verið greitt til afurðastöðva en samkvæmt nýjustu breytingum rennur nú beint til bænda. Verð fyrir kjöt af fullorðnu verður óbreytt frá fyrra ári.

„Sláturhúsið verður fullmannað miðvikudaginn 1. september. Það er viku seinna en í fyrra, en þá voru þó nokkuð margir dagar sem ekki nýttust til fulls. Það hefur verið erfitt að fá fé í byrjun sláturáætlunar til að fylla heila daga í húsinu,“ segir Sigmundur Hreiðarsson vinnslustjóri Norðlenska á Húsavík.