Nýjustu fréttir

Allt stefnir í að sorpurðunarmál Eyfirðinga, sem miklar og heitar umræður hafa verið um undanfarin ár, séu að komast í nýjan farveg sem leiða mun til þess að urðun á Glerárdal verði hætt. Snemma á þessu ári fór fram umræða um þessi mál innan forystuhóps matvælaklasa Vaxtarsamnings Eyjafjarðar þar sem skýrt kom fram að forystumenn matvælafyrirtækja töldu sorpmál svæðisins forgangsmál til lausnar fyrir greinina og í raun ímynd svæðisins. Í kjölfarið tók Sigmundur Ófeigsson, framkvæmdastjóri Norðlenska, að sér að vinna málið áfram og í samvinnu við sérfræðinga á þessu sviði hefur nú verið unnin skýrsla og viðskiptaáætlun um stofnun fyrirtækis til að jarðgera allan lífrænan úrgang af svæðinu. Skýrslan var kynnt stjórn Sorpsamlags Eyjafjarðar fyrir skömmu og í kjölfarið fulltrúum sveitarfélaganna og fékk góðar undirtektir. Því næst var sveitarfélögunum við Eyjafjörð sent erindi um vilja þeirra til að miðla lífrænum úrgangi til slíks fyrirtækis og leggja því til stofnfé og hafa borist svör frá meirihluta sveitarfélaganna. Sigmundur Ófeigsson segir nú stefnt að því að stofna fyrirtæki um jarðgerðina innan þriggja vikna og að slík stöð verði risin fyrir mitt næsta ár. Gangi það eftir telur hann óhætt að fullyrða að urðun á Glerárdal verði alfarið hætt innan þriggja ára.

Á þessu hausti hefur Norðlenska flutt út sem næst 66 tonn af fersku lambakjöti til Bandaríkjanna, þar sem það er selt í verslunum Whole Foods, fyrst og fremst á Washington- og Baltimoresvæðinu á austurströndinni. Ingvar Már Gíslason, sölu- og markaðsstjóri Norðlenska, segir að lambapakkar séu vinsælasta varan, en þeir innihalda læri, hrygg, skanka og framstykki.  Kjötið fer allt ferskt  í flugi og skipum og því er einungis um að ræða útflutning í september og október, meðan á haustslátrun stendur.