Nýjustu fréttir

Í dag var undirritaður víðtækur samstarfssamningur Norðlenska og Landflutninga-Samskipa sem kveður á um að Landflutningar-Samskip taka að sér flutning á allri fersk- og frystivöru Norðlenska til viðskiptavina fyrirtækisins út um allt land frá Akureyri, Húsavík og Höfn í Hornafirði. Jafnframt felur samningurinn í sér dreifingu á vörum Norðlenska til viðskiptavina á Akureyri og höfuðborgarsvæðinu. Samningurinn er til næstu fjögurra ára og tók gildi frá og með 15. september 2005. Verðmæti samningsins er um hálfur milljarður króna. Sigmundur E. Ófeigsson, framkvæmdastjóri Norðlenska, segir fyrirtækið hafa átt farsælt samstarf við Landflutninga-Samskip síðustu ár og með þessum nýja samningi sé staðfest áframhaldandi samstarf félaganna á víðtækari grunni en áður. Sigmundur segir að Norðlenska hafi í samvinnu við Landflutninga-Samskip þróað víðtækt kælivörudreifikerfi á höfuðborgarsvæðinu sem tryggi ferskleika framleiðsluvara Norðlenska til viðskiptavina fyrirtækisins á því svæði. Björgvin Jón Bjarnason, framkvæmdastjóri innanlandssviðs Samskipa, segir að með þessum samningi sé verið að samþætta flutningsþörf Norðlenska við sérhæft kæliflutningsnet Landflutninga-Samskipa. Hann segir að stöðugt sé verið að herða kröfur um meðhöndlun og kælingu matvæla og til að mæta þeim séu eingöngu notaðir þar til búnir kælibílar, sem uppfylli öll ströngustu skilyrði um kælingu og dreifingu ferskra matvæla. Þá tekur Björgvin fram að Landflutningar-Samskip muni vinna að þróunarverkefnum sem miði að því að lækka flutnings- og dreifingarkostnað Norðlenska enn frekar. Samskip hyggjast byggja upp framtíðaraðstöðu fyrirtækisins á Akureyri á næstu lóð við Norðlenska og telur Björgvin að aukin nálægð milli fyrirtækjanna veiti enn frekari tækifæri til samstarfs þeirra í milli.

Eins og alþjóð veit bregðast björgunarsveitarmenn ávallt vel við þegar til þeirra er leitað. Sjö félagar í Björgunarsveitinni Súlum á Akureyri tókust á við nokkuð óvenjulegt verkefni sl. laugardag þegar Norðlenska óskaði eftir liðsinni þeirra við pökkun og verðmerkingu á sviðum. Erfiðlega hefur gengið að fullmanna sviðaverkunina og því var leitað til björgunarsveitarmanna, sem tóku þetta verkefni að sér með bros á vör. Ingvar Már Gíslason, markaðsstjóri Norðlenska, segir björgunarsveitarmennina hafa, eins og við var búist, leyst verkefnið af stakri prýði. Vinnulaun björgunarsveitarmannanna fyrir sviðapökkunina og verðmerkinguna renna óskert til reksturs Súlna, sem eins og kunnugt er hefur með höndum yfirgripsmikla starfsemi.

Sláturtíð er hafin af fullum krafti hjá Norðlenska á Húsavík. Nú þegar er búið að slátra 19.500 lömbum en gert sé ráð fyrir að slátra um u.þ.b. 90-95 þúsund á Húsavík í þessari sláturtíð. Hjá Norðlenska á Höfn er slátrun að fara af stað í þessari viku. Reiknað er með að slátra um 32.000 fjár þar á þessu hausti. Að sögn Sigmundar Hreiðarssonar stöðvastjóra á Húsavík hefur það sem af er, verið slátrað frá 1.700 - 1.900 stk á dag en þegar mest er, er farið upp í 2.000 lömb. Slátrunin hefur gengið vonum framar og var síðasta vika ein sú besta í sögu slátrunar á Húsavík, hvað gæði í verkun varðar. Sigmundur segir að ágætlega hafi gengið að manna sláturhúsið en töluvert sé af útlendingum í húsinu eða allt að 10 þjóðerni og við það fái fyrirtækið mjög svo alþjóðlegt yfirbragð.